مکمل شاعری

دی سادگی سے جان پڑوں کوہ کن کے پاؤں

ہیہات کیوں نہ ٹوٹ گئے پیرزن کے پاؤں

دھوتا ہوں جب میں پینے کو اس سیم تن کے پاؤں

رکھتا ہے ضد سے کھینچ کے باہر لگن کے پاؤں

بھاگے تھے ہم بہت سو اسی کی سزا ہے یہ

ہو کر اسیر دابتے ہیں راہزن کے پاؤں

ہے جوش گل بہار میں یاں تک کہ ہر طرف

اڑتے ہوئے الجھتے ہیں مرغ چمن کے پاؤں

اللہ رے ذوق دشت نوردی کہ بعد مرگ

ہلتے ہیں خود بہ خود مرے اندر کفن کے پاؤں

شب کو کسی کے خواب میں آیا نہ ہو کہیں

دکھتے ہیں آج اس بت نازک بدن کے پاؤں

غالبؔ مرے کلام میں کیوں کر مزا نہ ہو

پیتا ہوں دھوکے خسرو شیریں سخن کے پاؤں

مرہم کی جستجو میں پھرا ہوں جو دور دور

تن سے سوا فگار ہیں اس خستہ تن کے پاؤں

— مرزا اسد اللہ بیگ خان