مکمل شاعری

افسردگی نہیں طرب انشائے التفات

ہاں درد بن کے دل میں مگر جا کرے کوئی

جب تک دہان زخم نہ پیدا کرے کوئی

مشکل کہ تجھ سے راہ سخن وا کرے کوئی

عالم غبار وحشت مجنوں ہے سر بہ سر

کب تک خیال طرۂ لیلا کرے کوئی

رونے سے اے ندیم ملامت نہ کر مجھے

آخر کبھی تو عقدۂ دل وا کرے کوئی

لخت جگر سے ہے رگ ہر خار شاخ گل

تا چند باغبانی صحرا کرے کوئی

سر بر ہوئی نہ وعدۂ صبر آزما سے عمر

فرصت کہاں کہ تیری تمنا کرے کوئی

چاک جگر سے جب رہ پرسش نہ وا ہوئی

کیا فائدہ کہ جیب کو رسوا کرے کوئی

ناکامی نگاہ ہے برق نظارہ سوز

تو وہ نہیں کہ تجھ کو تماشا کرے کوئی

ہے وحشت طبیعت ایجاد یاس خیز

یہ درد وہ نہیں کہ نہ پیدا کرے کوئی

ہر سنگ و خشت ہے صدف گوہر شکست

نقصاں نہیں جنوں سے جو سودا کرے کوئی

حسن فروغ شمع سخن دور ہے اسدؔ

پہلے دل گداختہ پیدا کرے کوئی

وحشت کہاں کہ بے خودی انشا کرے کوئی

ہستی کو لفظ معنی عنقا کرے کوئی

بیکاری جنوں کو ہے سر پیٹنے کا شغل

جب ہاتھ ٹوٹ جائیں تو پھر کیا کرے کوئی

عرض سرشک پر ہے فضاۓ زمانہ تنگ

صحرا کہاں کہ دعوت دریا کرے کوئی

وہ شوخ اپنے حسن پہ مغرور ہے اسدؔ

دکھلا کے اس کو آئنہ توڑا کرے کوئی

جو کچھ ہے محو شوخی ابروئے یار ہے

آنکھوں کو رکھ کے طاق پہ دیکھا کرے کوئی

— مرزا اسد اللہ بیگ خان