مکمل شاعری

تیرے توسن کو صبا باندھتے ہیں

ہم بھی مضموں کی ہوا باندھتے ہیں

غلطی ہائے مضامیں مت پوچھ

لوگ نالے کو رسا باندھتے ہیں

قید ہستی سے رہائی معلوم

اشک کو بے سر و پا باندھتے ہیں

تیری فرصت کے مقابل اے عمر

برق کو پابہ حنا باندھتے ہیں

آہ کا کس نے اثر دیکھا ہے

ہم بھی ایک اپنی ہوا باندھتے ہیں

پاؤں میں جب وہ حنا باندھتے ہیں

میرے ہاتھوں کو جدا باندھتے

اہل تدبیر کی واماندگیاں

آبلوں پر بھی حنا باندھتے ہیں

سادہ پرکار ہیں خوباں غالبؔ

ہم سے پیمان وفا باندھتے ہیں

تیرے بیمار پہ ہیں فریادی

وہ جو کاغذ میں دوا باندھتے ہیں

شیخ جی کعبے کا جانا معلوم

آپ مسجد میں گدھا باندھتے ہیں

قید میں بھی ہے اسیری آزاد

چشم زنجیر کو وا باندھتے ہیں

کس کا دل زلف سے بھاگا کہ اسدؔ

دست شانہ بہ قضا باندھتے ہیں

حسن افسردہ دلی ہا رنگیں

شوق کو پا بہ حنا باندھتے ہیں

نشۂ رنگ سے ہے واشد گل

مست کب بند قبا باندھتے ہیں

— مرزا اسد اللہ بیگ خان