مکمل شاعری

دل ہوا کشمکش چارۂ زحمت میں تمام

مٹ گیا گھسنے میں اس عقدے کا وا ہو جانا

عشرت قطرہ ہے دریا میں فنا ہو جانا

درد کا حد سے گزرنا ہے دوا ہو جانا

تجھ سے قسمت میں مری صورت قفل ابجد

تھا لکھا بات کے بنتے ہی جدا ہو جانا

ہے مجھے ابر بہاری کا برس کر کھلنا

روتے روتے غم فرقت میں فنا ہو جانا

بخشے ہے جلوۂ گل ذوق تماشا غالبؔ

چشم کو چاہیے ہر رنگ میں وا ہو جانا

تا کہ تجھ پر کھلے اعجاز ہوائے صیقل

دیکھ برسات میں سبز آئنے کا ہو جانا

اب جفا سے بھی ہیں محروم ہم اللہ اللہ

اس قدر دشمن ارباب وفا ہو جانا

ضعف سے گریہ مبدل بہ دم سرد ہوا

باور آیا ہمیں پانی کا ہوا ہو جانا

دل سے مٹنا تری انگشت حنائی کا خیال

ہو گیا گوشت سے ناخن کا جدا ہو جانا

گر نہیں نکہت گل کو ترے کوچے کی ہوس

کیوں ہے گرد رہ جولان صبا ہو جانا

— مرزا اسد اللہ بیگ خان