مکمل شاعری

لاف تمکیں فریب سادہ دلی

ہم ہیں اور راز ہائے سینہ گداز

نہ گل نغمہ ہوں نہ پردۂ ساز

میں ہوں اپنی شکست کی آواز

تو اور آرائش خم کاکل

میں اور اندیشہ ہائے دور دراز

ہوں گرفتار الفت صیاد

ورنہ باقی ہے طاقت پرواز

نہیں دل میں مرے وہ قطرۂ خوں

جس سے مژگاں ہوئی نہ ہو گلباز

وہ بھی دن ہو کہ اس ستم گر سے

ناز کھینچوں بجائے حسرت ناز

تو ہوا جلوہ گر مبارک ہو

ریزش سجدۂ جبین نیاز

مجھ کو پوچھا تو کچھ غضب نہ ہوا

میں غریب اور تو غریب نواز

اسدؔ اللہ خاں تمام ہوا

اے دریغا وہ رند شاہد باز

اے ترا غمزہ یک قلم انگیز

اے ترا ظلم سر بہ سر انداز

— مرزا اسد اللہ بیگ خان