مکمل شاعری

متقابل ہے مقابل میرا

رک گیا دیکھ روانی میری

خلش غمزۂ خوں ریز نہ پوچھ

دیکھ خونابہ فشانی میری

کب وہ سنتا ہے کہانی میری

اور پھر وہ بھی زبانی میری

ہوں زخود رفتۂ بیدائے خیال

بھول جانا ہے نشانی میری

کیا بیاں کر کے مرا روئیں گے یار

مگر آشفتہ بیانی میری

کر دیا ضعف نے عاجز غالبؔ

ننگ پیری ہے جوانی میری

قدر سنگ سر رہ رکھتا ہوں

سخت ارزاں ہے گرانی میری

دہن اس کا جو نہ معلوم ہوا

کھل گئی ہیچ مدانی میری

گرد باد رہ بیتابی ہوں

صرصر شوق ہے بانی میری

— مرزا اسد اللہ بیگ خان