مکمل شاعری

حریف مطلب مشکل نہیں فسون نیاز

دعا قبول ہو یا رب کہ عمر خضر دراز

نہ ہو بہ ہرزہ بیاباں نورد وہم وجود

ہنوز تیرے تصور میں ہے نشیب و فراز

ہر ایک ذرۂ عاشق ہے آفتاب پرست

گئی نہ خاک ہوئے پر ہواۓ جلوۂ ناز

وصال جلوہ تماشا ہے پر دماغ کہاں

کہ دیجے آئنۂ انتظار کو پرداز

نہ پوچھ وسعت مے خانۂ جنوں غالبؔ

جہاں یہ کاسۂ گردوں ہے ایک خاک انداز

اسدؔ سے ترک وفا کا گماں وہ معنی ہے

کہ کھینچیے پر طائر سے صورت پرواز

ز بسکہ جلوۂ صییاد حیرت آرا ہے

اڑی ہے صفحۂ خاطر سے صورت پرواز

ہنوز اے اثر دید ننگ رسوائی

نگاہ فتنہ خرام و در دو عالم باز

فریب صنعت ایجاد کا تماشا دیکھ

نگاہ عکس فروش و خیال آئنہ ساز

ہجوم فکر سے دل مثل موج لرزے ہے

کہ شیشہ نازک و صہبائے آبگینہ گداز

— مرزا اسد اللہ بیگ خان