مکمل شاعری
رخ نگار سے ہے سوز جاودانی شمع
ہوئی ہے آتش گل آب زندگانی شمع
کرے ہے صرف بہ ایماۓ شعلہ قصہ تمام
بہ طرز اہل فنا ہے فسانہ خوانی شمع
زبان اہل زباں میں ہے مرگ خاموشی
یہ بات بزم میں روشن ہوئی زبانی شمع
ترے خیال سے روح اہتزاز کرتی ہے
بہ جلوہ ریزی باد و بہ پر فشانی شمع
نشاط داغ غم عشق کی بہار نہ پوچھ
شگفتگی ہے شہید گل خزانی شمع
جلے ہے دیکھ کے بالین یار پر مجھ کو
نہ کیوں ہو دل پہ مرے داغ بد گمانی شمع
غم اس کو حسرت پروانہ کا ہے اے شعلے
ترے لرزنے سے ظاہر ہے نا توانی شمع
— مرزا اسد اللہ بیگ خان