مکمل شاعری

پھر مجھے دیدۂ تر یاد آیا

دل جگر تشنۂ فریاد آیا

سادگی ہائے تمنا یعنی

پھر وہ نیرنگ نظر یاد آیا

دم لیا تھا نہ قیامت نے ہنوز

پھر ترا وقت سفر یاد آیا

عذر واماندگی اے حسرت دل

نالہ کرتا تھا جگر یاد آیا

کیا ہی رضواں سے لڑائی ہوگی

گھر ترا خلد میں گر یاد آیا

زندگی یوں بھی گزر ہی جاتی

کیوں ترا راہ گزر یاد آیا

پھر ترے کوچہ کو جاتا ہے خیال

دل گم گشتہ مگر یاد آیا

آہ وہ جرأت فریاد کہاں

دل سے تنگ آ کے جگر یاد آیا

میں نے مجنوں پہ لڑکپن میں اسدؔ

سنگ اٹھایا تھا کہ سر یاد آیا

وصل میں ہجر کا ڈر یاد آیا

عین جنت میں سقر یاد آیا

کوئی ویرانی سی ویرانی ہے

دشت کو دیکھ کے گھر یاد آیا

— مرزا اسد اللہ بیگ خان