مکمل شاعری

بہتیری گرو جنس کلالوں کے پڑی ہے

کیا ذکر ہے واعظ کے مصلیٰ و ردا کا

ہے ابر کی چادر شفقی جوش سے گل کے

میخانے کے ہاں دیکھیے یہ رنگ ہوا کا

مر جائے گا باتوں میں کوئی غم زدہ یوں ہی

ہر لحظہ نہ ہو ممتحن ارباب وفا کا

تدبیر تھی تسکیں کے لیے لوگوں کی ورنہ

معلوم تھا مدت سے ہمیں نفع دوا کا

برسوں سے تو یوں ہے کہ گھٹا جب امنڈ آئی

تب دیدۂ تر سے بھی ہوا ایک جھڑاکا

ہاتھ آئینہ رویوں سے اٹھا بیٹھیں نہ کیوں کر

بالعکس اثر پاتے تھے ہم اپنی دعا کا

کرتے ہی نہیں ترک بتاں طور جفا کا

شاید ہمیں دکھلاویں گے دیدار خدا کا

آنکھ اس کی نہیں آئینے کے سامنے ہوتی

حیرت زدہ ہوں یار کی میں شرم و حیا کا

آنکھ اس سے نہیں اٹھنے کی صاحب نظروں کی

جس خاک پہ ہوگا اثر اس کی کف پا کا

تلوار کے سائے ہی میں کاٹے ہے تو اے میرؔ

کس دل زدہ کو ہوئے ہے یہ ذوق فنا کا

— مير تقی میر