مکمل شاعری

بہار اب کے بھی جو گزری قفس میں

تو پھر اپنی رہائی ہو چکی بس

نہ آیا وہ مرے جاتے جہاں سے

یہیں تک آشنائی ہو چکی بس

امیروں تک رسائی ہو چکی بس

مری بخت آزمائی ہو چکی بس

کہاں تک اس سے قصہ قضیہ ہر شب

بہت باہم لڑائی ہو چکی بس

شرر کی سی ہے چشمک فرصت عمر

جہاں دے ٹک دکھائی ہو چکی بس

لگا ہے حوصلہ بھی کرنے تنگی

غموں کی اب سمائی ہو چکی بس

برابر خاک کے تو کر دکھایا

فلک بس بے ادائی ہو چکی بس

گلے میں گیروی کفنی ہے اب میرؔ

تمہاری میرزائی ہو چکی بس

دکھا اس بت کو پھر بھی یا خدایا

تری قدرت نمائی ہو چکی بس

دنی کے پاس کچھ رہتی ہے دولت

ہمارے ہاتھ آئی ہو چکی بس

— مير تقی میر