مکمل شاعری

کہتے ہیں آگے تھا بتوں میں رحم

ہے خدا جانیے یہ کب کی بات

کیا کہیں اپنی اس کی شب کی بات

کہیے ہووے جو کچھ بھی ڈھب کی بات

گو کہ آتش‌ زباں تھے آگے میرؔ

اب کی کہیے گئی وہ تب کی بات

اب تو چپ لگ گئی ہے حیرت سے

پھر کھلے گی زبان جب کی بات

نکتہ دانان رفتہ کی نہ کہو

بات وہ ہے جو ہووے اب کی بات

ظلم ہے قہر ہے قیامت ہے

غصے میں اس کے زیر لب کی بات

کس کا روئے سخن نہیں ہے ادھر

ہے نظر میں ہماری سب کی بات

— مير تقی میر