مکمل شاعری

نگاہ مست سے جب چشم نے اس کی اشارت کی

حلاوت مے کی اور بنیاد میخانے کی غارت کی

نظر سے جس کی یوسف سا گیا پھر اس کو کیا سوجھے

حقیقت کچھ نہ پوچھو پیر کنعاں کی بصارت کی

نزاکت کیا کہوں خورشید رو کی کل شب مہ میں

گیا تھا سائے سائے باغ تک تس پر حرارت کی

ترے کوچے کے شوق طوف میں جیسے بگولا تھا

بیاباں میں غبار میرؔ کی ہم نے زیارت کی

خرابی کچھ نہ پوچھو ملکت دل کی عمارت کی

غموں نے آج کل سنیو وہ آبادی ہی غارت کی

جلایا جس تجلی جلوہ گر نے طور کو ہم دم

اسی آتش کے پر کالے نے ہم سے بھی شرارت کی

سحر گہ میں نے پوچھا گل سے حال زار بلبل کا

پڑے تھے باغ میں یک مشت پر اودھر اشارت کی

— مير تقی میر