مکمل شاعری
دل جو زیر غبار اکثر تھا
کچھ مزاج ان دنوں مکدر تھا
اس پہ تکیہ کیا تو تھا لیکن
رات دن ہم تھے اور بستر تھا
اب خرابہ ہوا جہان آباد
ورنہ ہر اک قدم پہ یاں گھر تھا
سرسری تم جہاں سے گزرے
ورنہ ہر جا جہان دیگر تھا
دل کی کچھ قدر کرتے رہیو تم
یہ ہمارا بھی ناز پرور تھا
کیوں نہ ابر سیہ سفید ہوا
جب تلک عہد دیدۂ تر تھا
بعد یک عمر جو ہوا معلوم
دل اس آئینہ رو کا پتھر تھا
بارے سجدہ ادا کیا تہ تیغ
کب سے یہ بوجھ میرے سر پر تھا
صاحب جاہ و شوکت و اقبال
اک ازاں جملہ اب سکندر تھا
بے زری کا نہ کر گلا غافل
رہ تسلی کہ یوں مقدر تھا
اتنے منعم جہان میں گزرے
وقت رحلت کے کس کنے زر تھا
تھی یہ سب کائنات زیر نگیں
ساتھ مور و ملخ سا لشکر تھا
آخر کار جب جہاں سے گیا
ہاتھ خالی کفن سے باہر تھا
خوش رہا جب تلک رہا جیتا
میرؔ معلوم ہے قلندر تھا
لعل و یاقوت ہم زر و گوہر
چاہیے جس قدر میسر تھا
عیب طول کلام مت کریو
کیا کروں میں سخن سے خوگر تھا