مکمل شاعری

فتنے رہتے ہیں اس کے سائے میں

قد و قامت ترا قیامت ہے

نالۂ عجز نقص الفت ہے

رنج و محنت کمال راحت ہے

عشق ہی گریۂ ندامت ہے

ورنہ عاشق کو چشم خفت ہے

رونا آتا ہے دم بدم شاید

کسو حسرت کی دل سے رخصت ہے

تو تو نادان ہے نپٹ ناصح

کب مؤثر تری نصیحت ہے

نہ تجھے رحم نے اسے ٹک صبر

دل پہ میرے عجب مصیبت ہے

تا دم مرگ غم خوشی کا نہیں

دل آزردہ گر سلامت ہے

ایسے ہنس مکھ کو شمع سے تشبیہ

شمع مجلس کی رونی صورت ہے

ابر تر کے حضور پھوٹ بہا

دیدۂ تر کو میرے رحمت ہے

کیا ہوا گر غزل قصیدہ ہوئی

عاقبت قصۂ محبت ہے

رنج و محنت سے باز کیونکے رہوں

وقت جاتا رہے تو حسرت ہے

تو بھی تقریب فاتحہ سے چل

بخدا واجب الزیارت ہے

تربت میرؔ پر ہیں اہل سخن

ہر طرف حرف ہے حکایت ہے

دل میں ناسور پھر جدھر چاہے

ہر طرف کوچۂ جراحت ہے

تیرا شکوہ مجھے نہ میرا تجھے

چاہیے یوں جو فی الحقیقت ہے

دل پہ جب میرے آ کے یہ ٹھہرا

کہ مجھے خوش دلی اذیت ہے

باطل السحر دیکھ باطل تھے

تیری آنکھوں کا سحر آفت ہے

تجھ کو مسجد ہے مجھ کو مے خانہ

واعظا اپنی اپنی قسمت ہے

کیا ہے پھر کوئی دم کو کیا جانو

دم غنیمت میاں جو فرصت ہے

گاہ نالاں تپاں گہے بے دم

دل کی میرے عجب ہی حالت ہے

— مير تقی میر