مکمل شاعری

کب تلک یہ ستم اٹھائیے گا

ایک دن یوں ہی جی سے جائیے گا

سب سے مل چل کہ حادثے سے پھر

کہیں ڈھونڈا بھی تو نہ پائیے گا

کہیے گا اس سے قصۂ مجنوں

یعنی پردے میں غم سنائیے گا

شرکت شیخ و برہمن سے میرؔ

کعبہ و دیر سے بھی جائیے گا

نہ موئے ہم اسیری میں تو نسیم

کوئی دن اور باؤ کھائیے گا

اپنی ڈیڑھ اینٹ کی جدی مسجد

کسی ویرانے میں بنایئے گا

شکل تصویر بے خودی کب تک

کسو دن آپ میں بھی آئیے گا

اس کے پابوس کی توقع پر

اپنے تیں خاک میں ملایئے گا

اس کے پاؤں کو جا لگی ہے حنا

خوب سے ہاتھ اسے لگایئے گا

— مير تقی میر