مکمل شاعری

قیامت ہیں یہ چسپاں جامے والے

گلوں نے جن کی خاطر خرقے ڈالے

کہاں تک دور بیٹھے بیٹھے کہیے

کبھو تو پاس ہم کو بھی بلا لے

وہ کالا چور ہے خال رخ یار

کہ سو آنکھوں میں دل ہو تو چرا لے

ستایا میرؔ غم کش کو کنھوں نے

کہ پھر اب عرش تک جاتے ہیں نالے

نہیں اٹھتا دل محزوں کا ماتم

خدا ہی اس مصیبت سے نکالے

تپش نے دل جگر کی مار ڈالا

بغل میں دشمن اپنے ہم نے پالے

دلا بازی نہ کر ان گیسوؤں سے

نہیں آساں کھلانے سانپ کالے

نہ مہکے بوئے گل اے کاش یک چند

ابھی زخم جگر سارے ہیں آلے

کسے قید قفس میں یاد گل کی

پڑے ہیں اب تو جینے ہی کے لالے

— مير تقی میر