مکمل شاعری
ہنستے ہو روتے دیکھ کر غم سے
چھیڑ رکھی ہے تم نے کیا ہم سے
مند گئی آنکھ ہے اندھیرا پاک
روشنی ہے سو یاں مرے دم سے
سب نے جانا کہیں یہ عاشق ہے
بہہ گئے اشک دیدۂ نم سے
درہمی آ گئی مزاجوں میں
آخر ان گیسوان درہم سے
مفت یوں ہاتھ سے نہ کھو ہم کو
کہیں پیدا بھی ہوتے ہیں ہم سے
تم جو دل خواہ خلق ہو ہم کو
دشمنی ہے تمام عالم سے
اکثر آلات جور اس سے ہوئے
آفتیں آئیں اس کے مقدم سے
کوئی بیگانہ گر نہیں موجود
منہ چھپانا یہ کیا ہے پھر ہم سے
دیکھ وے پلکیں برچھیاں چلیاں
تیغ نکلی اس ابروئے خم سے
وجہ پردے کی پوچھیے بارے
ملیے اس کے کسو جو محرم سے
درپئے خون میرؔ ہی نہ رہو
ہو بھی جاتا ہے جرم آدم سے
— مير تقی میر