مکمل شاعری

تیغ ستم سے اس کی مرا سر جدا ہوا

شکر خدا کہ حق محبت ادا ہوا

وہ تو نہیں کہ اشک تھمے ہی نہ آنکھ سے

نکلے ہے کوئی لخت دل اب سو جلا ہوا

عالم کی بے فضائی سے تنگ آ گئے تھے ہم

جاگا سے دل گیا جو ہمارا بجا ہوا

قاصد کو دے کے خط نہیں کچھ بھیجنا ضرور

جاتا ہے اب تو جی ہی ہمارا چلا ہوا

بد تر ہے زیست مرگ سے ہجران یار میں

بیمار دل بھلا نہ ہوا تو بھلا ہوا

حیران رنگ باغ جہاں تھا بہت رکا

تصویر کی کلی کی طرح دل نہ وا ہوا

در پے ہمارے جی کے ہوا غیر کے لیے

انجام کار مدعی کا مدعا ہوا

اس کے گئے پہ دل کی خرابی نہ پوچھیے

جیسے کسو کا کوئی نگر ہو لٹا ہوا

کہتا تھا میرؔ حال تو جب تک تو تھا بھلا

کچھ ضبط کرتے کرتے ترا حال کیا ہوا

— مير تقی میر