مکمل شاعری

پیری میں کیا جوانی کے موسم کو روئیے

اب صبح ہونے آئی ہے اک دم تو سوئیے

رخسار اس کے ہائے رے جب دیکھتے ہیں ہم

آتا ہے جی میں آنکھوں کو ان میں گڑویئے

کس طور آنسوؤں میں نہاتے ہیں غم کشاں

اس آب گرم میں تو نہ انگلی ڈبوئیے

اخلاص دل سے چاہیے سجدہ نماز میں

بے فائدہ ہے ورنہ جو یوں وقت کھوئیے

آلودہ اس گلی کی جو ہوں خاک سے تو میرؔ

آب حیات سے بھی نہ وے پاؤں دھوئیے

اب جان جسم خاکی سے تنگ آ گئی بہت

کب تک اس ایک ٹوکری مٹی کو ڈھویئے

مطلب کو تو پہنچتے نہیں اندھے کے سے طور

ہم مارتے پھرے ہیں یو نہیں ٹپے ٹویئے

— مير تقی میر