مکمل شاعری
اب جو اک حسرت جوانی ہے
عمر رفتہ کی یہ نشانی ہے
گریہ ہر وقت کا نہیں بے ہیچ
دل میں کوئی غم نہانی ہے
رشک یوسف ہے آہ وقت عزیز
عمر اک بار کاروانی ہے
ہم قفس زاد قیدی ہیں ورنہ
تا چمن ایک پرفشانی ہے
اس کی شمشیر تیز ہے ہمدم
مر رہیں گے جو زندگانی ہے
غم و رنج و الم نکو یاں سے
سب تمہاری ہی مہربانی ہے
یاں ہوئے میرؔ تم برابر خاک
واں وہی ناز و سرگرانی ہے
خاک تھی موجزن جہاں میں اور
ہم کو دھوکا یہ تھا کہ پانی ہے
— مير تقی میر