مکمل شاعری

غصے سے اٹھ چلے ہو تو دامن کو جھاڑ کر

جاتے رہیں گے ہم بھی گریبان پھاڑ کر

یا رب رہ طلب میں کوئی کب تلک پھرے

تسکین دے کہ بیٹھ رہوں پاؤں گاڑ کر

نکلیں گے کام دل کے کچھ اب اہل ریش سے

کچھ ڈھیر کر چکے ہیں یہ آگے اکھاڑ کر

منظور ہو نہ پاس ہمارا تو حیف ہے

آئے ہیں آج دور سے ہم تجھ کو تاڑ کر

غالب کہ دیوے قوت دل اس ضعیف کو

تنکے کو جو دکھاوے ہے پل میں پہاڑ کر

دل وہ نگر نہیں کہ پھر آباد ہو سکے

پچھتاؤ گے سنو ہو یہ بستی اجاڑ کر

اس فن کے پہلوانوں سے کشتی رہی ہے میرؔ

بہتوں کو ہم نے زیر کیا ہے پچھاڑ کر

— مير تقی میر