مکمل شاعری

مر جاؤ کوئی پروا نہیں ہے

کتنا ہے مغرور اللہ اللہ

اب حال اپنا اس کے ہے دل خواہ

کیا پوچھتے ہو الحمدللہ

پیر مغاں سے بے اعتقادی

استغفر اللہ استغفر اللہ

کہتے ہیں اس کے تو منہ لگے گا

ہو یوں ہی یا رب جوں ہے یہ افواہ

حضرت سے اس کی جانا کہاں ہے

اب مر رہے گا یاں بندہ درگاہ

مجرم ہوئے ہم دل دے کے ورنہ

کس کو کسو سے ہوتی نہیں چاہ

گزرے ہے دیکھیں کیوں کر ہماری

اس بے وفا سے نے رسم نے راہ

اس پر کہ تھا وہ شہ رگ سے اقرب

ہرگز نہ پہنچا یہ دست کوتاہ

تھی خواہش دل رکھنا حمائل

گردن میں اس کی ہر گاہ و بیگاہ

سب عقل کھوئے ہے راہ محبت

ہو خضر دل میں کیسا ہی گمراہ

کیا کیا نہ ریجھیں تم نے پچائیں

اچھا رجھایا اے مہرباں آہ

جلوے ہیں اس کے شانیں ہیں اس کی

کیا روز کیا خور کیا رات کیا ماہ

ہے ماسوا کیا جو میرؔ کہیے

آگاہ سارے اس سے ہیں آگاہ

ظاہر کہ باطن اول کہ آخر

اللہ اللہ اللہ اللہ

— مير تقی میر