مکمل شاعری

غم رہا جب تک کہ دم میں دم رہا

دل کے جانے کا نہایت غم رہا

جامۂ احرام زاہد پر نہ جا

تھا حرم میں لیک نامحرم رہا

دل نہ پہنچا گوشۂ داماں تلک

قطرۂ خوں تھا مژہ پر جم رہا

زلفیں کھولیں تو تو ٹک آیا نظر

عمر بھر یاں کام دل برہم رہا

حسن تھا تیرا بہت عالم فریب

خط کے آنے پر بھی اک عالم رہا

سنتے ہیں لیلیٰ کے خیمے کو سیاہ

اس میں مجنوں کا مگر ماتم رہا

صبح پیری شام ہونے آئی میرؔ

تو نہ چیتا یاں بہت دن کم رہا

اس کے لب سے تلخ ہم سنتے رہے

اپنے حق میں آب حیواں سم رہا

میرے رونے کی حقیقت جس میں تھی

ایک مدت تک وہ کاغذ نم رہا

— مير تقی میر