مکمل شاعری
حشر تک یاں دل شکیبا چاہئے
کب ملیں دلبر سے دیکھا چاہئے
ہے تجلی بھی نقاب روئے یار
اس کو کن آنکھوں سے دیکھا چاہئے
بھا گئے ہیں آپ کے انداز و ناز
کیجئے اغماض جتنا چاہئے
دوستوں کی بھی نہ ہو پروا جسے
بے نیازی اس کی دیکھا چاہئے
شیخ ہے ان کی نگہ جادو بھری
صحبت رنداں سے بچنا چاہئے
لگ گئی چپ حالیؔ رنجور کو
حال اس کا کس سے پوچھا چاہئے
ہے کچھ اک باقی خلش امید کی
یہ بھی مٹ جائے تو پھر کیا چاہئے
ہے دل افگاروں کی دل داری ضرور
گر نہیں الفت مدارا چاہئے
غیر ممکن ہے نہ ہو تاثیر غم
حال دل پھر اس کو لکھا چاہئے
— الطاف حسین حالی