مکمل شاعری

ہے پہنچنا اپنا چوٹی تک محال

اے طلب نکلا بہت اونچا پہاڑ

آج تک قصر امل ہے ناتمام

بندھ چکی ہے بارہا کھل کھل کے پاڑ

کھیلنا آتا ہے ہم کو بھی شکار

پر نہیں زاہد کوئی ٹٹی کی آڑ

گھر ہے وحشت خیز اور بستی اجاڑ

ہو گئی ایک اک گھڑی تجھ بن پہاڑ

عید اور نوروز ہے سب دل کے ساتھ

دل نہیں حاضر تو دنیا ہے اجاڑ

تم نے حالیؔ کھول کر ناحق زباں

کر لیا ساری خدائی سے بگاڑ

دل نہیں روشن تو ہیں کس کام کے

سو شبستاں میں اگر روشن ہیں جھاڑ

بات واعظ کی کوئی پکڑی گئی

ان دنوں کم تر ہے کچھ ہم پر لتاڑ

کھیت رستے پر ہے اور رہ رو سوار

کشت ہے سرسبز اور نیچی ہے باڑ

— الطاف حسین حالی