مکمل شاعری
رہیں نا آشنا زمانہ سے
حق ہے تیرا یہ آشناؤں پر
اس کے کوچہ میں ہیں وہ بے پر و بال
اڑتے پھرتے ہیں جو ہواؤں پر
شہسواروں پہ بند ہے جو راہ
وقف ہے یاں برہنہ پاؤں پر
ہے یہ تکیہ تری عطاؤں پر
وہی اصرار ہے خطاؤں پر
ہے وہ دیر آشنا تو عیب ہے کیا
مرتے ہیں ہم انہیں اداؤں پر
رہروو با خبر رہو کہ گماں
رہزنی کا ہے رہنماؤں پر
نہیں منعم کو اس کی بوند نصیب
مینہ برستا ہے جو گداؤں پر
حق سے درخواست عفو کی حالیؔ
کیجے کس منہ سے ان خطاؤں پر
نہیں محدود بخششیں تیری
زاہدوں پر نہ پارساؤں پر
— الطاف حسین حالی