مکمل شاعری

وصل کا اس کے دل زار تمنائی ہے

نہ ملاقات ہے جس سے نہ شناسائی ہے

نظر آتی نہیں اب دل میں تمنا کوئی

بعد مدت کے تمنا مری بر آئی ہے

نشہ میں چور نہ ہوں جھانجھ میں مخمور نہ ہوں

پند یہ پیر خرابات نے فرمائی ہے

قوت دست خدائی ہے شکیبائی میں

وقت جب آ کے پڑا ہے یہی کام آئی ہے

ڈر نہیں غیر کا جو کچھ ہے سو اپنا ڈر ہے

ہم نے جب کھائی ہے اپنے ہی سے زک کھائی ہے

بات سچی کہی اور انگلیاں اٹھیں سب کی

سچ میں حالیؔ کوئی رسوائی سی رسوائی ہے

قطع امید نے دل کر دیے یکسو صد شکر

شکل مدت میں یہ اللہ نے دکھلائی ہے

— الطاف حسین حالی