مکمل شاعری

جنوں کار فرما ہوا چاہتا ہے

قدم دشت پیما ہوا چاہتا ہے

خط آنے لگے شکوہ آمیز ان کے

ملاپ ان سے گویا ہوا چاہتا ہے

بہت کام لینے تھے جس دل سے ہم کو

وہ صرف تمنا ہوا چاہتا ہے

ابھی لینے پائے نہیں دم جہاں میں

اجل کا تقاضا ہوا چاہتا ہے

دم گریہ کس کا تصور ہے دل میں

کہ اشک اشک دریا ہوا چاہتا ہے

مجھے کل کے وعدے پہ کرتے ہیں رخصت

کوئی وعدہ پورا ہوا چاہتا ہے

فزوں تر ہے کچھ ان دنوں ذوق عصیاں

در رحمت اب وا ہوا چاہتا ہے

وفا شرط الفت ہے لیکن کہاں تک؟

دل اپنا بھی تجھ سا ہوا چاہتا ہے

بہت حظ اٹھاتا ہے دل تجھ سے مل کر

قلق دیکھیے کیا ہوا چاہتا ہے

قلق گر یہی ہے تو راز نہانی

کوئی دن میں رسوا ہوا چاہتا ہے

— الطاف حسین حالی