مکمل شاعری

واں اگر جائیں تو لے کر جائیں کیا

منہ اسے ہم جا کے یہ دکھلائیں کیا

آؤ لیں اس کو ہمیں جا کر منا

اس کی بے پروائیوں پر جائیں کیا

دل میں ہے باقی وہی حرص گناہ

پھر کیے سے اپنے ہم پچھتائیں کیا

مان لیجے شیخ جو دعویٰ کرے

اک بزرگ دیں کو ہم جھٹلائیں کیا

جانتا دنیا کو ہے اک کھیل تو

کھیل قدرت کے تجھے دکھلائیں کیا

ہو چکے حالیؔ غزل خوانی کے دن

راگنی بے وقت کی اب گائیں کیا

دل کو سب باتوں کی ہے ناصح خبر

سمجھے سمجھائے کو بس سمجھائیں کیا

دل کو مسجد سے نہ مندر سے ہے انس

ایسے وحشی کو کہیں بہلائیں کیا

عمر کی منزل تو جوں توں کٹ گئی

مرحلے اب دیکھیے پیش آئیں کیا

— الطاف حسین حالی