مکمل شاعری
وصل جاناں محال ٹھہرایا
قتل عاشق روا کیا تو نے
دل کو درد آشنا کیا تو نے
درد دل کو دوا کیا تو نے
طبع انساں کو دی سرشت وفا
خاک کو کیمیا کیا تو نے
تھا نہ جز غم بساط عاشق میں
غم کو راحت فزا کیا تو نے
راہ زاہد کو جب کہیں نہ ملی
در مے خانہ وا کیا تو نے
جان تھی اک وبال فرقت میں
شوق کو جاں گزا کیا تو نے
قطع ہونے ہی جب لگا پیوند
غیر کو آشنا کیا تو نے
تھی جہاں کارواں کو دینی راہ
عشق کو رہنما کیا تو نے
تھی محبت میں ننگ منت غیر
جذب دل کو رسا کیا تو نے
ناؤ بھر کر جہاں ڈبونی تھی
عقل کو ناخدا کیا تو نے
بڑھ گئی جب پدر کو مہر پسر
اس کو اس سے جدا کیا تو نے
جب دیا راہرو کو ذوق طلب
سعی کو نارسا کیا تو نے
عشق کو تاب انتظار نہ تھی
غرفہ اک دل میں وا کیا تو نے
جب ہوا ملک و مال رہزن ہوش
بادشہ کو گدا کیا تو نے
سخت افسردہ طبع تھی احباب
ہم کو جادو نوا کیا تو نے
پھر جو دیکھا تو کچھ نہ تھا یا رب
کون پوچھے کہ کیا کیا تو نے
جب ملی کام جاں کو لذت درد
درد کو بے دوا کیا تو نے
حالیؔ اٹھا ہلا کے محفل کو
آخر اپنا کہا کیا تو نے
پردۂ چشم تھے حجاب بہت
حسن کو خود نما کیا تو نے
حرم آباد اور دیر خراب
جو کیا سب بجا کیا تو نے