مکمل شاعری

ہماری آہ بے تاثیر کا حال

کچھ اپنے دل سے کچھ اغیار سے پوچھ

حقیقت محرم اسرار سے پوچھ

مزا انگور کا مے خوار سے پوچھ

نہیں جز گریۂ غم حاصل عشق

ہماری چشم دریا بار سے پوچھ

دل مہجور سے سن لذت وصل

نشاط عافیت بیمار سے پوچھ

وفا اغیار کی اغیار سے سن

مری الفت در و دیوار سے پوچھ

فریب وعدۂ دل دار کی قدر

شہید خنجر انکار سے پوچھ

دلوں میں ڈالنا ذوق اسیری

کمند گیسوئے خم دار سے پوچھ

تصور میں کیا کرتے ہیں جو ہم

وہ تصویر خیال یار سے پوچھ

فغان شوق کو مانع نہیں وصل

یہ نکتہ عندلیب زار سے پوچھ

متاع بے بہا ہے شعر حالیؔ

مری قیمت مری گفتار سے پوچھ

نہیں آب بقا جز جلوۂ دوست

کسی لب تشنۂ دیدار سے پوچھ

— الطاف حسین حالی