مکمل شاعری

شکوہ کرنے کی خو نہ تھی اپنی

پر طبیعت ہی کچھ بھر آئی آج

بات کچھ ہم سے بن نہ آئی آج

بول کر ہم نے منہ کی کھائی آج

بزم ساقی نے دی الٹ ساری

خوب بھر بھر کے خم لنڈھائی آج

چپ پر اپنی بھرم تھے کیا کیا کچھ

بات بگڑی بنی بنائی آج

معصیت پر ہے دیر سے یا رب

نفس اور شرع میں لڑائی آج

غالب آتا ہے نفس دوں یا شرع

دیکھنی ہے تری خدائی آج

زد سے الفت کی بچ کے چلنا تھا

مفت حالیؔ نے چوٹ کھائی آج

چور ہے دل میں کچھ نہ کچھ یارو

نیند پھر رات بھر نہ آئی آج

— الطاف حسین حالی