مکمل شاعری
درمیاں پائے نظر ہے جب تک
ہم کو دعویٰ نہیں بینائی کا
سات پردوں میں نہیں ٹھہرتی آنکھ
حوصلہ کیا ہے تماشائی کا
عمر شاید نہ کرے آج وفا
کاٹنا ہے شب تنہائی کا
ایک دن راہ پہ جا پہنچے ہم
شوق تھا بادیہ پیمائی کا
تم نے کیوں وصل میں پہلو بدلا
کس کو دعویٰ ہے شکیبائی کا
اس سے نادان ہی بن کر ملیے
کچھ اجارہ نہیں دانائی کا
ہوں گے حالیؔ سے بہت آوارہ
گھر ابھی دور ہے رسوائی کا
کچھ تو ہے قدر تماشائی کی
ہے جو یہ شوق خود آرائی کا
بزم دشمن میں نہ جی سے اترا
پوچھنا کیا تری زیبائی کا
اس کو چھوڑا تو ہے لیکن اے دل
مجھ کو ڈر ہے تری خود رائی کا
مدد اے جذبۂ توفیق کہ یاں
ہو چکا کام توانائی کا
یہی انجام تھا اے فصل خزاں
گل و بلبل کی شناسائی کا
رنج اور رنج بھی تنہائی کا
وقت پہنچا مری رسوائی کا
محتسب عذر بہت ہیں لیکن
اذن ہم کو نہیں گویائی کا
— الطاف حسین حالی