مکمل شاعری
کیوں بڑھاتے ہو اختلاط بہت
ہم کو طاقت نہیں جدائی کی
ملتے غیروں سے ہو ملو لیکن
ہم سے باتیں کرو صفائی کی
لاگ میں ہیں لگاؤ کی باتیں
صلح میں چھیڑ ہے لڑائی کی
دل بھی پہلو میں ہو تو یاں کس سے
رکھئے امید دل ربائی کی
شہر و دریا سے باغ و صحرا سے
بو نہیں آتی آشنائی کی
دھوم تھی اپنی پارسائی کی
کی بھی اور کس سے آشنائی کی
دل رہا پائے بند الفت دام
تھی عبث آرزو رہائی کی
نہ ملا کوئی غارت ایماں
رہ گئی شرم پارسائی کی
بخت ہم داستانی شیدا
تو نے آخر کو نارسائی کی
منہ کہاں تک چھپاؤ گے ہم سے
تم کو عادت ہے خود نمائی کی
زندہ پھرنے کی ہے ہوس حالیؔ
انتہا ہے یہ بے حیائی کی
صحبت گاہ گاہی رشکی
تو نے بھی ہم سے بے وفائی کی
موت کی طرح جس سے ڈرتے تھے
ساعت آ پہنچی اس جدائی کی
— الطاف حسین حالی