مکمل شاعری
کیوں بڑھاتے ہو اختلاط بہت
ہم کو طاقت نہیں جدائی کی
دھوم تھی اپنی پارسائی کی
کی بھی اور کس سے آشنائی کی
دل بھی پہلو میں ہو تو یاں کس سے
رکھئے امید دل ربائی کی
منہ کہاں تک چھپاؤ گے ہم سے
تم کو عادت ہے خود نمائی کی
ملتے غیروں سے ہو ملو لیکن
ہم سے باتیں کرو صفائی کی
لاگ میں ہیں لگاؤ کی باتیں
صلح میں چھیڑ ہے لڑائی کی
بخت ہم داستانی شیدا
تو نے آخر کو نارسائی کی
صحبت گاہ گاہی رشکی
تو نے بھی ہم سے بے وفائی کی
دل رہا پائے بند الفت دام
تھی عبث آرزو رہائی کی
شہر و دریا سے باغ و صحرا سے
بو نہیں آتی آشنائی کی
نہ ملا کوئی غارت ایماں
رہ گئی شرم پارسائی کی
موت کی طرح جس سے ڈرتے تھے
ساعت آ پہنچی اس جدائی کی
زندہ پھرنے کی ہے ہوس حالیؔ
انتہا ہے یہ بے حیائی کی
— الطاف حسین حالی