مکمل شاعری

عشق بھی تاک میں بیٹھا ہے نظر بازوں کی

دیکھنا شیر سے آنکھیں نہ لڑانا ہرگز

جیتے جی موت کے تم منہ میں نہ جانا ہرگز

دوستو دل نہ لگانا نہ لگانا ہرگز

ہاتھ ملنے نہ ہوں پیری میں اگر حسرت سے

تو جوانی میں نہ یہ روگ بسانا ہرگز

ڈھونڈتا ہے دل شوریدہ بہانے مطرب

دردانگیز غزل کوئی نہ گانا ہرگز

لے کے داغ آئے گا سینے پہ بہت اے سیاح

دیکھ اس شہر کے کھنڈروں میں نہ جانا ہرگز

جتنے رستے تھے ترے ہو گئے ویراں اے عشق

آ کے ویرانوں میں اب گھر نہ بسانا ہرگز

صحبتیں اگلی مصور ہمیں یاد آئیں گی

کوئی دلچسپ مرقع نہ دکھانا ہرگز

تذکرہ دہلی مرحوم کا اے دوست نہ چھیڑ

نہ سنا جائے گا ہم سے یہ فسانہ ہرگز

کوچ سب کر گئے دلی سے ترے قدر شناس

قدر یاں رہ کے اب اپنی نہ گنوانا ہرگز

بخت سوئے ہیں بہت جاگ کے اے دور زماں

نہ ابھی نیند کے ماتوں کو جگانا ہرگز

داغؔ و مجروحؔ کو سن لو کہ پھر اس گلشن میں

نہ سنے گا کوئی بلبل کا ترانہ ہرگز

کبھی اے علم و ہنر گھر تھا تمہارا دلی

ہم کو بھولے ہو تو گھر بھول نہ جانا ہرگز

ہم کو گر تو نے رلایا تو رلایا اے چرخ

ہم پہ غیروں کو تو ظالم نہ ہنسانا ہرگز

آخری دور میں بھی تجھ کو قسم ہے ساقی

بھر کے اک جام نہ پیاسوں کو پلانا ہرگز

وہ تو بھولے تھے ہمیں ہم بھی انہیں بھول گئے

ایسا بدلا ہے نہ بدلے گا زمانہ ہرگز

غالبؔ و شیفتہؔ و نیرؔ و آزردہؔ و ذوقؔ

اب دکھائے گا یہ شکلیں نہ زمانا ہرگز

کر دیا مر کے یگانوں نے یگانہ ہم کو

ورنہ یاں کوئی نہ تھا ہم میں یگانہ ہرگز

مٹ گئے تیرے مٹانے کے نشاں بھی اب تو

اے فلک اس سے زیادہ نہ مٹانا ہرگز

مومنؔ و علویؔ و صہبائیؔ و ممنوںؔ کے بعد

شعر کا نام نہ لے گا کوئی دانا ہرگز

رات آخر ہوئی اور بزم ہوئی زیر و زبر

اب نہ دیکھو گے کبھی لطف شبانہ ہرگز

شاعری مر چکی اب زندہ نہ ہوگی یارو

یاد کر کر کے اسے جی نہ کڑھانا ہرگز

بزم ماتم تو نہیں بزم سخن ہے حالیؔ

یاں مناسب نہیں رو رو کے رلانا ہرگز

چپے چپے پہ ہیں یاں گوہر یکتا تہ خاک

دفن ہوگا کہیں اتنا نہ خزانہ ہرگز

— الطاف حسین حالی