مکمل شاعری

دل سے خیال دوست بھلایا نہ جائے گا

سینے میں داغ ہے کہ مٹایا نہ جائے گا

تم کو ہزار شرم سہی مجھ کو لاکھ ضبط

الفت وہ راز ہے کہ چھپایا نہ جائے گا

دیکھی ہیں ایسی ان کی بہت مہربانیاں

اب ہم سے منہ میں موت کے جایا نہ جائے گا

مے تند و ظرف حوصلۂ اہل بزم تنگ

ساقی سے جام بھر کے پلایا نہ جائے گا

کیوں چھیڑتے ہو ذکر نہ ملنے کا رات کے

پوچھیں گے ہم سبب تو بتایا نہ جائے گا

راضی ہیں ہم کہ دوست سے ہو دشمنی مگر

دشمن کو ہم سے دوست بنایا نہ جائے گا

مقصود اپنا کچھ نہ کھلا لیکن اس قدر

یعنی وہ ڈھونڈتے ہیں جو پایا نہ جائے گا

ملنا ہے آپ سے تو نہیں حصر غیر پر

کس کس سے اختلاط بڑھایا نہ جائے گا

بگڑیں نہ بات بات پہ کیوں جانتے ہیں وہ

ہم وہ نہیں کہ ہم کو منایا نہ جائے گا

اے دل رضائے غیر ہے شرط رضائے دوست

زنہار بار عشق اٹھایا نہ جائے گا

جھگڑوں میں اہل دیں کے نہ حالیؔ پڑیں بس آپ

قصہ حضور سے یہ چکایا نہ جائے گا

— الطاف حسین حالی