مکمل شاعری

حق وفا کے جو ہم جتانے لگے

آپ کچھ کہہ کے مسکرانے لگے

ہم کو جینا پڑے گا فرقت میں

وہ اگر ہمت آزمانے لگے

ڈر ہے میری زباں نہ کھل جائے

اب وہ باتیں بہت بنانے لگے

سخت مشکل ہے شیوۂ تسلیم

ہم بھی آخر کو جی چرانے لگے

سر باطن کو فاش کر یا رب

اہل ظاہر بہت ستانے لگے

جان بچتی نظر نہیں آتی

غیر الفت بہت جتانے لگے

وقت رخصت تھا سخت حالیؔ پر

ہم بھی بیٹھے تھے جب وہ جانے لگے

تم کو کرنا پڑے گا عذر جفا

ہم اگر درد دل سنانے لگے

جی میں ہے لوں رضائے پیر مغاں

قافلے پھر حرم کو جانے لگے

تھا یہاں دل میں طعن وصل عدو

عذر ان کی زباں پہ آنے لگے

— الطاف حسین حالی