مکمل شاعری

وہ جس پہ تمہیں شمع‌ سر رہ کا گماں ہے

وہ شعلۂ آوارہ ہماری ہی زباں ہے

اب ہاتھ ہمارے ہے عناں رخش جنوں کی

اب سر پہ ہمارے کلہ سنگ بتاں ہے

کام آئے بہت لوگ سر‌‌ مقتل ظلمات

اے روشنیٔ کوچۂ‌ دلدار کہاں ہے

چبھتے ہی بنی خار صفت پائے خزاں میں

کیا کیجے بہت ہم کو غم لالہ رخاں ہے

اے فصل جنوں ہم کو پئے شغل گریباں

پیوند ہی کافی ہے اگر جامہ گراں ہے

بس پھیر کے منہ خار قدم کھینچ رہے تھے

دیکھا تو نہاں قافلۂ‌ ہم سفراں ہے

مجروحؔ کہاں سے گہر گندم و جو لائیں

اپنی تو گرہ میں یہی چشم نگراں ہے

— مجروح سلطانپوری