مکمل شاعری

مرے پیچھے یہ تو محال ہے کہ زمانہ گرم سفر نہ ہو

کہ نہیں مرا کوئی نقش پا جو چراغ راہ گزر نہ ہو

شب ظلم نرغۂ راہزن سے پکارتا ہے کوئی مجھے

میں فراز دار سے دیکھ لوں کہیں کاروان سحر نہ ہو

میں ہزار شکل بدل چکا چمن جہاں میں سن اے صبا

کہ جو پھول ہے ترے ہاتھ میں یہ مرا ہی لخت جگر نہ ہو

ترے پا زمیں پہ رکے رکے ترا سر فلک پہ جھکا جھکا

کوئی تجھ سے بھی ہے عظیم تر یہی وہم تجھ کو مگر نہ ہو

جنہیں سب سمجھتے ہیں مہر و مہ نہ ہوں صرف چند نقوش پا

جسے کہتے ہیں کرۂ زمیں فقط ایک سنگ سفر نہ ہو

رخ تیغ سے جو نہ ہو کبھی سحر ایسی کوئی نہیں مری

نہیں ایسی ایک بھی شام جو تہ زلف دار بسر نہ ہو

مرے ہاتھ ہیں تو لوں گا خود میں اب اپنا ساقی مے کدہ

خم غیر سے تو خدا کرے لب جام بھی مرا تر نہ ہو

— مجروح سلطانپوری