مکمل شاعری

دیار شام نہیں منزل سحر بھی نہیں

عجب نگر ہے یہاں دن چلے نہ رات چلے

جلا کے مشعل جاں ہم جنوں صفات چلے

جو گھر کو آگ لگائے ہمارے ساتھ چلے

ہوا اسیر کوئی ہم نوا تو دور تلک

بپاس طرز نوا ہم بھی ساتھ ساتھ چلے

بچا کے لائے ہم اے یار پھر بھی نقد وفا

اگرچہ لٹتے رہے رہزنوں کے ہاتھ چلے

ستون دار پہ رکھتے چلو سروں کے چراغ

جہاں تلک یہ ستم کی سیاہ رات چلے

پھر آئی فصل کہ مانند برگ آوارہ

ہمارے نام گلوں کے مراسلات چلے

بھلا ہی بیٹھے جب اہل حرم تو اے مجروحؔ

بغل میں ہم بھی لیے اک صنم کا ہاتھ چلے

ہمارے لب نہ سہی وہ دہان زخم سہی

وہیں پہنچتی ہے یارو کہیں سے بات چلے

قطار شیشہ ہے یا کاروان ہم سفراں

خرام جام ہے یا جیسے کائنات چلے

— مجروح سلطانپوری