مکمل شاعری

ہم نے کس رات نالہ سر نہ کیا

پر اسے آہ کچھ اثر نہ کیا

دیکھنے کو رہے ترستے ہم

نہ کیا رحم تو نے پر نہ کیا

کیوں بھویں تانتے ہو بندہ نواز

سینہ کس وقت میں سپر نہ کیا

سب کے ہاں تم ہوئے کرم فرما

اس طرف کو کبھو گزر نہ کیا

سب کے جوہر نظر میں آئے دردؔ

بے ہنر تو نے کچھ ہنر نہ کیا

کتنے بندوں کو جان سے کھویا

کچھ خدا کا بھی تو نے ڈر نہ کیا

کون سا دل ہے وہ کہ جس میں آہ

خانہ آباد تو نے گھر نہ کیا

آپ سے ہم گزر گئے کب کے

کیا ہے ظاہر میں گو سفر نہ کیا

تجھ سے ظالم کے سامنے آیا

جان کا میں نے کچھ خطر نہ کیا

— خواجہ میر درد