مکمل شاعری

وہ ان کے دل میں شوق خودنمائی کا خیال آنا

وہ ہر شے کا تبسم کے لیے تیار ہو جانا

نوید عیش سے اے دل ذرا ہشیار ہو جانا

کسی تازہ مصیبت کے لیے تیار ہو جانا

گداز دل سے باطن کا تجلی زار ہو جانا

محبت اصل میں ہے روح کا بیدار ہو جانا

وہ آرائش میں سب قوت کسی کا صرف کر دینا

تحمل میں وہ ہر کوشش مری بے کار ہو جانا

سحر کا اس طرح انگڑائی لینا دل فریبی سے

ادھر شاعر کے محسوسات کا بیدار ہو جانا

معاذ اللہ اب یہ رنگ ہے دنیا کی محفل کا

خدا کا نام لینا اور ذلیل و خوار ہو جانا

مزاج حسن کو اب بھی نہ سمجھو تو قیامت ہے

ہمارا اور وفا کے نام سے بے زار ہو جانا

توسل سے ترے دل میں بھروں گا قوتیں برقی

ذرا میری طرف بھی اے نگاہ یار ہو جانا

رگوں سے خون سارا زہر بن کر پھوٹ نکلے گا

ذرا اے جوشؔ ضبط شوق سے ہشیار ہو جانا

— جوش ملیح آبادی