مکمل شاعری

جس کے مرض پہ صحت عالم نثار ہو

کس طرح وہ مریض دعائے شفا کرے

مجھ بے نوا کے ناز اٹھائے وہ نازنیں

سلطان اور کاوش قرب گدا کرے

لے دے کے رہ گیا ہے یہی ایک آسرا

ایسا کبھی نہ ہو کہ وہ ترک وفا کرے

بت جس پہ ملتفت ہو بہ حد سپردگی

زندیق ہے اگر وہ خدا سے دعا کرے

اس روئے دل نشیں پہ نگاہیں جمی رہیں

فریاد کر رہی ہے بصیرت کہ کیا کرے

دامان بوئے کاکل شب رنگ چھوڑ دے

یا رب کبھی یہ ظلم نہ باد صبا کرے

عمر دراز و پختگی فکر نکتہ سنج

کہتی ہے خام کام مجھے ہاں کہا کرے

صیاد دام زلف سے مجھ کو رہا کرے

وہ دن تمام عمر نہ آئے خدا کرے

یا رب حصار نجد سے اب اٹھ سکے نہ جوشؔ

یونان دے رہا ہے دہائی دیا کرے

اب دام حسن و عشق سے نکلوں نہ تا بہ مرگ

گھر جل رہا ہے عقل رسا کا جلا کرے

حکمت نمک حرام ہوں بے شک ترا مگر

جس پر پڑے یہ وقت وہ بچارا کیا کرے

— جوش ملیح آبادی