مکمل شاعری

وہ کریں بھی تو کن الفاظ میں تیرا شکوہ

جن کو تیری نگہ لطف نے برباد کیا

اتنا مانوس ہوں فطرت سے کلی جب چٹکی

جھک کے میں نے یہ کہا مجھ سے کچھ ارشاد کیا

کچھ نہیں اس کے سوا جوشؔ حریفوں کا کلام

وصل نے شاد کیا ہجر نے ناشاد کیا

سوز غم دے کے مجھے اس نے یہ ارشاد کیا

جا تجھے کشمکش دہر سے آزاد کیا

میری ہر سانس ہے اس بات کی شاہد اے موت

میں نے ہر لطف کے موقع پہ تجھے یاد کیا

اے میں سو جان سے اس طرز تکلم کے نثار

پھر تو فرمائیے کیا آپ نے ارشاد کیا

مجھ کو تو ہوش نہیں تم کو خبر ہو شاید

لوگ کہتے ہیں کہ تم نے مجھے برباد کیا

اس کا رونا نہیں کیوں تم نے کیا دل برباد

اس کا غم ہے کہ بہت دیر میں برباد کیا

دل کی چوٹوں نے کبھی چین سے رہنے نہ دیا

جب چلی سرد ہوا میں نے تجھے یاد کیا

— جوش ملیح آبادی