مکمل شاعری

چھیڑا تھا جسے پہلے پہل تیری نظر نے

اب تک ہے وہ اک نغمۂ بے ساز و صدا یاد

دنیا کے ستم یاد نہ اپنی ہی وفا یاد

اب مجھ کو نہیں کچھ بھی محبت کے سوا یاد

میں شکوہ بلب تھا مجھے یہ بھی نہ رہا یاد

شاید کہ مرے بھولنے والے نے کیا یاد

جب کوئی حسیں ہوتا ہے سرگرم نوازش

اس وقت وہ کچھ اور بھی آتے ہیں سوا یاد

مدت ہوئی اک حادثۂ عشق کو لیکن

اب تک ہے ترے دل کے دھڑکنے کی صدا یاد

ہاں ہاں تجھے کیا کام مری شدت غم سے

ہاں ہاں نہیں مجھ کو ترے دامن کی ہوا یاد

کیا جانئے کیا ہو گیا ارباب جنوں کو

مرنے کی ادا یاد نہ جینے کی ادا یاد

کیا لطف کہ میں اپنا پتہ آپ بتاؤں

کیجے کوئی بھولی ہوئی خاص اپنی ادا یاد

میں ترک رہ و رسم جنوں کر ہی چکا تھا

کیوں آ گئی ایسے میں تری لغزش پا یاد

— جگر مراد آبادی