مکمل شاعری

نگاہوں سے چھپ کر کہاں جائیے گا

جہاں جائیے گا ہمیں پائیے گا

مٹا کر ہمیں آپ پچھتائیے گا

کمی کوئی محسوس فرمائیے گا

ہمیں بھی یہ اب دیکھنا ہے کہ ہم پر

کہاں تک توجہ نہ فرمائیے گا

ستم عشق میں آپ آساں نہ سمجھیں

تڑپ جائیے گا جو تڑپائیے گا

کہیں چپ رہی ہے زبان محبت

نہ فرمائیے گا تو فرمائیے گا

نہیں کھیل ناصح جنوں کی حقیقت

سمجھ لیجئے گا تو سمجھائیے گا

جو اب بھی نہ تکلیف فرمائیے گا

تو بس ہاتھ ملتے ہی رہ جائیے گا

مرا جب برا حال سن پائیے گا

خراماں خراماں چلے آئیے گا

ہمیں جب نہ ہوں گے تو کیا رنگ محفل

کسے دیکھ کر آپ شرمایئے گا

ترا جذبۂ شوق ہے بے حقیقت

ذرا پھر تو ارشاد فرمائیے گا

یہ دل ہے اسے دل ہی بس رہنے دیجے

کرم کیجئے گا تو پچھتائیے گا

بھلانا ہمارا مبارک مبارک

مگر شرط یہ ہے نہ یاد آئیے گا

محبت محبت ہی رہتی ہے لیکن

کہاں تک طبیعت کو بہلایئے گا

یہ مانا کہ دے کر ہمیں رنج فرقت

مداوائے فرقت نہ فرمائیے گا

ہمیں بھی نہ اب چین آئے گا جب تک

ان آنکھوں میں آنسو نہ بھر لائیے گا

نہ ہوگا ہمارا ہی آغوش خالی

کچھ اپنا بھی پہلو تہی پائیے گا

جنوں کی جگرؔ کوئی حد بھی ہے آخر

کہاں تک کسی پر ستم ڈھایئے گا

— جگر مراد آبادی