مکمل شاعری

قاتل رہبر قاتل رہزن

دل سا دوست نہ دل سا دشمن

پھول کھلے ہیں گلشن گلشن

لیکن اپنا اپنا دامن

کوئی یہ کہہ دے گلشن گلشن

لاکھ بلائیں ایک نشیمن

برق حوادث اللہ اللہ

جھوم رہی ہے شاخ نشیمن

رحمت ہوگی طالب عصیاں

رشک کرے گی پاکئ دامن

تجھ سا حسیں اور خون محبت

وہم ہے شاید سرخی دامن

بیٹھے ہم ہر بزم میں لیکن

جھاڑ کے اٹھے اپنا دامن

آج نہ جانے راز یہ کیا ہے

ہجر کی رات اور اتنی روشن

عشق ہے پیارے کھیل نہیں ہے

عشق ہے کار شیشہ و آہن

خیر مزاج حسن کی یارب

تیز بہت ہے دل کی دھڑکن

آ کہ نہ جانے تجھ بن کب سے

روح ہے لاشہ جسم ہے مدفن

تو نے سلجھ کر گیسوئے جاناں

اور بڑھا دی شوق کی الجھن

دل کہ مجسم آئینہ ساماں

اور وہ ظالم آئینہ دشمن

عمریں بیتیں صدیاں گزریں

ہے وہی اب تک عشق کا بچپن

کانٹوں کا بھی حق ہے کچھ آخر

کون چھڑائے اپنا دامن

ہستئ شاعر اللہ اللہ

حسن کی منزل عشق کا مسکن

رنگیں فطرت سادہ طبیعت

فرش نشیں اور عرش نشیمن

چلتی پھرتی چھاؤں ہے پیارے

کس کا صحرا کیسا گلشن

کام ادھورا اور آزادی

نام بڑے اور تھوڑے درشن

شمع ہے لیکن دھندھلی دھندھلی

سایا ہے لیکن روشن روشن

— جگر مراد آبادی