مکمل شاعری
آ کہ تجھ بن بہت دنوں سے یہ دل
ایک سونا مکان ہے پیارے
سب پہ تو مہربان ہے پیارے
کچھ ہمارا بھی دھیان ہے پیارے
تو جہاں ناز سے قدم رکھ دے
وہ زمین آسمان ہے پیارے
ہم سے جو ہو سکا سو کر گزرے
اب ترا امتحان ہے پیارے
صبر ٹوٹے ہوئے دلوں کا نہ لے
تو یوں ہی دھان پان ہے پیارے
مختصر ہے یہ شوق کی روداد
ہر نفس داستان ہے پیارے
اپنے جی میں ذرا تو کر انصاف
کب سے نامہربان ہے پیارے
مجھ میں تجھ میں تو کوئی فرق نہیں
عشق کیوں درمیان ہے پیارے
کیا کہے حال دل غریب جگرؔ
ٹوٹی پھوٹی زبان ہے پیارے
— جگر مراد آبادی